nga John Milton Publicistikë; fjalim; traktak

Përktheu: Ajsela Koka

Përshkrim i shkurtër

Areopagjitika është shkrimi më madhor në prozë i Xhon Miltonit dhe teksti i parë i letërsisë evropiane kushtuar tërësisht lirisë së shtypit e të mendimit. E shkruar në Londër, në vitin 1644, gjatë marrjes së pushtetit nga Parlamenti anglez, pas viteve të gjata të monarkisë absolute të mbretit Karli I, vepra përbën një apel zemërthyer ndaj forcave parlamentare e protestante, në anën e të cilave Miltoni ishte radhitur tashmë publikisht me besim të plotë. Parlamenti, i frikësuar nga vala e botimeve të broshurave e shkrimeve polemike të çfarëdolloji, që ndoqi rënien, në vitin 1640, të tërë sistemit legjislativ të miratuar nga monarku, kishte nisur sërish të vendoste kontrolle ndaj shtypit, të cilat kërcënonin të godisnin, mes të tjerash, edhe shkrimet në mbështetje të divorcit të vetë Miltonit.

Megjithatë teksti i kësaj vepre integrale e kapërcen dimensionin personal, për të lëvizur brenda një hapësire të pamatë historike dhe ideale, duke arritur të na ofrojë një përkufizim të ri e plot zjarr të lirive individuale, pa të cilat nuk do të kishte kuptim një shoqëri e lirë dhe moderne.