nga Elton John #Autobiografi

Përktheu: Manushaqe Bako

Nr i faqeve 372

Përshkrim i shkurtër

ELTON XHONI është kantautori me suksesin më jetëgjatë në të gjitha kohërat. Jeta e tij është e jashtëzakonshme, shtatë dekadat e jetuara (deri tani) të mbushura me ngritje e ulje të pabesueshme. Tashmë,me fjalët e veta dhe me ndershmërinë që e karakterizon, ai ndan historinë e tij – çastet argëtuese dhe ato që të copëtojnë shpirtin.  Zbulon të vërtetën e fëmijërisë së jetuar në Pinër, në periferi të Londrës dhe marrëdhëniet e vështira me prindërit. I pagëzuar me emrin Rexhinald Duajt, ai ishte një djalë i druajtur,me ëndrra të pagjasa për t’u bërë yll i muzikës pop. Në moshën 23 vjeç, interpretoi koncertin e parë në Amerikë, ku, i veshur me kominoshe gjoksore të verdha, T-shirt të stolisur me yje dhe këpucë me flatra,u përball me një publik të mahnitshëm. Kishte mbërritur Elton Xhoni dhe bota e muzikës nuk do të ishte më e njëjta.  

Autobiografia UNË është e mbushur me dramë, që nga refuzimi i hershëm i punës së Eltonit me partnerin këngëshkrues Berni Topin deri në daljen jashtë kontrollit të superyllit që kryesonte listat e klasifikimit të këngëve; nga miqësia me Xhon Lenonin, Fredi Mërkërin dhe Xhorxh Majkëllin deri te vallëzimi disko me Mbretëreshën; nga orvatjet për vetëvrasje deri te varësia ndaj drogës, që do ta mbante mbërthyer për më shumë se një dekadë.

Eltoni shkruan fuqishëm edhe për çtoksikimin dhe ngritjen e Fondacionit AIDS.  

Ai rrëfen për gjetjen e dashurisë së vërtetë me Dejvid Fërnishin, pushimet me Versaçen dhe interpretimin në ceremoninë mortore të Princeshës Diana. Përshkruan çastin ekzakt kur kupton se dëshiron të bëhet baba dhe jeta e tij ndryshon sërish kryekëput.  

Gazmore, argëtuese dhe herë-herë thellësisht prekëse, autobiografia UNË do t’ju çojë në një udhëtim intim me një legjendë të gjallë.